Colombo Today Local News

අභියාචනාධිකරණ තීන්දුවට අනුව අමාත්‍ය මණ්ඩලයේ සියලු දීමනා අත්හිටුවයි

කැබිනට් මණ්ඩලය අත්හිටුවමින් අභියාචනාධිකරණය නිකුත් කරන ලද අතුරු නියෝගය අනුව අමාත්‍යවරුන්ට සහ ඔවුන්ගේ පෞද්ගලික කාර්යමණ්ඩලවලට ගෙවන සියලු ගෙවීම් තාවකාලිකව නවතා දමා ඇතැයි රජයේ ජ්‍යෙෂ්ඨ නිලධාරියෙක් කී බව ‘ද සන්ඩේ ටයිම්ස්‘ පුවත්පත වාර්තා කරයි. 

මේ අනුව අමාත්‍යවරුන්ට, රාජ්‍ය සහ නියෝජ්‍ය අමාත්‍යවරුන්ට ගෙවන සියලු ගෙවීම්, දුරකතන සහ ඉන්ධන දීමනා ඇතුළු සියලු දීමනා මෙන්ම පෞද්ගලික කාර්යමණ්ඩලවලට ගෙවන ලද වේතන යනාදි සියල්ල පසුගිය සතියේ සිට තාවකාලිකව නවතා දමා ඇතැයි රාජ්‍ය පරිපාලන අමාත්‍යාංශයේ ලේකම් ජේ.ජේ.රත්නසිරි මහතා සන්ඬේ ටයිම්ස් පුවත්පතට පැවැසීය. 

“මීට පෙර පවත්වන ලද උත්සව, ඉසවු යනාදිය වෙනුවෙන් ගෙවීම් කරන්නැයි ඉදිරිපත් කරන කිසිවකටද මුදල් ලබානොදෙන ලෙස උපදෙස් ලැබී තිබෙනවා” යැයි ද හෙතෙම කීය. 

පාර්ලිමේන්තුවේදී සම්මත වූ යෝජනා සහ අභියාචනාධිකරණ තීන්දුව අනුව අමාත්‍යවරුන්ට කරන ගෙවීම් සම්බන්ධයෙන් අමාත්‍යාංශ ලේකම්වරුන් පසුගිය සතියේදී ජනාධිපතිවරයාගෙන් කරුණු පැහැදිලි කරගෙන ඇති අතර ඒ අනුව ඉහත උපදෙස් ලැබී ඇත. 

අධිකරණ තීන්දුව අනුව කිසිදු ගෙවීමකට අවසර නොදෙන ලෙස ද ජනාධිපති මෛත්‍රිපාල සිරිසේන මහතා එහිදි උපදෙස් දුන් බව ද රත්නසිරි මහතා කීය. 

අභියාචනාධිකරණය දුන් අතුරු නියෝගය මගින් අමාත්‍යවරුන්ට සහ කාර්ය මණ්ඩලවලට ගෙවීම් නොකරන ලෙස සෘජුව සහ විශේෂයෙන් සඳහන් නොකළද අග්‍රාමාත්‍යවරයා, කැබිනට් අමාත්‍යවරුන්, රාජ්‍ය සහ නියෝජ්‍ය අමාත්‍යවරුන් නිලතල දැරීමෙන් සහ අදාළ කටයුතුවලින් වැළැකී සිටි බව අග්‍රාමාත්‍ය ලේකම් එස්. අමරසේකර මහතා පැවැසීය. 

ජනාධිපතිවරයා සහ ඔහුගේ ලේකම්වරයා ලබාදෙන නියෝග සහ උපදෙස් පමණක් පිළිපදින ලෙසද, මූල්‍ය කටයුතු සම්බන්ධයෙන් මුදල් අමාත්‍යාංශ ලේකම්වරයාගෙන් ද පරිපාලන කටයුතු සම්බන්ධයෙන් රාජ්‍ය පරිපාලන අමාත්‍යාංශයේ ලේකම්වරයාගෙන් ද කරුණු විමසන්නැයි සියලු අමාත්‍යාංශ ලේකම්වරුන්ට උපදෙස් ලැබුණු බව ද අමරසේකර මහතා කීවේය. 

සන්ඬේ ටයිම්ස් ඇසුරිනි 

Related posts

පොලීසිය ඩයගම ප්‍රදේශයේ රැසකගෙන් ප්‍රකාශ ලබාගනි. – ඉෂාලිනිගේ සිරුර ගොඩ ගැනිමට දින කිහිපයක් ගතවෙන ලකුණු

colombotoday

මිනුවන්ගොඩ මුල්‍ය සමාගමක සේවකයෙකුට කොරෝනා

colombotoday

පාර්ලිමේන්තු සභාවාරය ඇරඹෙයි

Admin

MCC ගිවිසුම සම්බන්ධව මාගේ නායකත්වය යටතේ සාකච්ඡා වුයේ නෑ- කබ්රාල්

colombotoday

ඖෂධ මිල පාලන ගැසට් පත්‍රය සිකුරාදා

colombotoday

අගමැති රනිල් අද මුදල් ඇමති ධුරයේ දිවුරුම් දෙයි

colombotoday