දකුණු කොරියාවේ ධීවර අංශයේ රැකියාවන්ට ශ්‍රී ලාංකිකයින් බඳවා ගැනීමේ සම්මුඛ පරීක්ෂණ සඳහා අයදුම්පත් නිකුත් කිරීම මේ මස 19 සිට 21 දක්‌වා සිදුකෙරෙන බව ශ්‍රී ලංකා විදේශ සේවා නියුක්‌ති කාර්යාංශය පවසයි.
අයදුම්පත් ගාල්ල, මාතර, හම්බන්තොට. ගම්පහ, ත්‍රිකුණාමලය, රත්නපුර, රත්මලාන, අනුරාධපුර හා හලාවත යන කාර්යාංශයේ පුහුණු මධ්‍යස්‌ථානවලදී නිකුත් කෙරේ.
මෙම භාෂා ප්‍රවීණතා (කොරියන් භාෂාව) පරීක්ෂණ සඳහා අයදුම් කළ හැක්‌කේ වයස අවුරුදු 18 – 39 අතර අයට වන අතර ධීවර ක්‍ෂේත්‍රයේ රැකියා සඳහා පමණක්‌ අයදුම් කළ යුතුවේ.
අයදුම්පත් නොමිලේ සපයන අතර විභාග ගාස්‌තු පවතින විනිමය අනුපාතය අනුව ඇමරිකන් ඩොලර් 24 කි. එය දළ වශයෙන් රුපියල් 3420 කි. විදේශ ගමන් බලපත්‍රයේ පිටපතක්‌, 3.5Ü4.5 ජප ප්‍රමාණයේ වර්ණ ඡායාරූපයක්‌ අයදුම්පත සමඟ ඉදිරිපත් කිරිම අනිවාර්ය වේ.
මෙවර පරීක්‍ෂණයෙන් අයදුම්කරුවෝ 700 ක් පමණ බඳවා ගනිති. දකුණු කොරියාවේ රැකියා හා කම්කරු අමාත්‍යාංශය හා මෙරට විදේශ රැකියා අමාත්‍යාංශය අතර අත්සන් තබන අවබෝධතා ගිවිසුම් ප්‍රකාරව ශ්‍රී ලංකා විදේශ සේවා නියුක්‌ති කාර්යාංශයට පමණක්‌ දකුණු කොරියාවට ශ්‍රී ලංකාවෙන් ශ්‍රමිකයන් යෑවීම සඳහා නීත්‍යානුකූල බලය පවතින බව විදේශ රැකියා ඇමැතිනී තලතා අතුකෝරළ මහත්මිය පවසයි. 2015 වර්ෂයේ මාස 09 ඇතුළත පුද්ගලයන් 5,599 ක් දකුණු කොරියාවේ රැකියා සඳහා ගොස්‌ ඇත.