Colombo Today Local News

පැමිණිලිකාරයා සොයාගෙන ගිහින් නඩු දාන්න නීතියක් ලංකාවේ තවම නෑ – කොමිසමේ සභාපති විනිසුරු

හිටපු අමාත්‍ය රාජිත සේනාරත්නට සැප්තැම්බර් 25 වැනිදා දේශපාලන පළිගැනීම් පිළිබඳ විමර්ශනය කරන ජනාධිපති කොමිසම හමුවේ පෙනී සිටින ලෙස අද (12)දින නොතීසි නිකුත් කෙරුණි.

එසේම අපරාධ පරීක්ෂණ දෙපාර්තමේන්තුවේ හිටපු පොලිස් පරීක්ෂක නිශාන්ත ද සිල්වා, සහකාර පොලිස් අධිකාරි බී.එස්. තිසේරා ටද එදින කොමිසමේ පෙනීසිටින ලෙස නොතීසි නිකුත් කර තිබේ.

ඒ, ලුතිතන් කර්නල් ප්‍රභාත් සීවලී බුලත්වත්ත මහතා කොමිසම හමුවේ කළ පැමිණිල්ලකට අනුවය.

2008 – 2009 කාල වකවානූවේදී මාධ්‍යවේදී කීත් නොයාර් ඇතුළු තවත් මාධ්‍යවේදීන් දෙදෙනෙකු පැහැරගෙන ගොස් පහරදීම සම්බන්ධයෙන් තමා ඇතුළු බුද්ධි අංශ නිළධාරීන් පිරිසක් 2017 පෙබරවාරි 18 වනදා අත්අඩංගුවට ගෙන රක්ෂිත බන්ධනාගාරගත කිරීම පළිගැනීමේ චේතනාවෙන් සිදුකර ඇතැයි ලුතිනන් කර්නල් ප්‍රභාත් සීවලී බුලත්වත්ත මහතා ජනාධිපති කොමිසමට පැමිණිලි කර තිබුණි.

අප්‍රේල් 21 ප්‍රහාරයට මුල්වූ සහරාන් හෂීම් සම්බන්ධයෙන් වැදගත් බුද්ධි තොරතුරු රැසක් අනාවරණය කරගත් මොහොතක දේශපාලන බලාධිකාරියේ බලපෑම් වලට යටත්ව තමා ඇතුළු බුද්ධි නිළධාරීන් කිහිපදෙනෙකුම අත්අඩංගුවට ගැනීම නිසා එම ත්‍රස්ත ප්‍රහාර එල්ලවූ බැවින් එහි වගකීම තමා ඇතුළු පිරිස අත්අඩංගුවට ගත් සි.අයි.ඩී යේ විමර්ශන නිළධාරින් භාරගත යුතු බව ද බුලත්වත්ත මහතා ප්‍රකාශ කළේය.

ඔහු පැවසුවේ අප්‍රේල් 21 ප්‍රහාරයෙන් දින 5 කට පසු එවක යුද හමුදාපතිව සිටි මහේෂ් සේනානායක මහතා තමන්ට යළි බුද්ධි සේවයට වාර්තා කරන්නයි දැනුම් දීමක් කළ බවය.

එක් අවස්ථාවක කොළඹ අංක 3 මහෙස්ත්‍රාත් අධිකරණයෙන් තමන්ට ඇප නියමවී තිබියදීත් කිසිදු පදනමක් නොමැතිව සී.අයි.ඩී නිළධාරීන්ගේ ඉල්ලීම තමා මහර බන්ධනාගාරය වෙත රැගෙන ගිය බව ද සාක්ෂිකරු කොමිසමට පැවසුවේය.

එහිදී ජනාධිපති කොමිසමේ සභාපති විනිසුරුවරයා සඳහන් කළේ “සියලු නඩු වලට ඇප තැන්පත් කර තිබියදී, එසේ කිරීම අවශ්‍ය නැහැ. ඇප දුන්නට පස්සේ බන්ධනාගාරයකට ගෙනියන්න කිසිම අයිතියක් නැහැ. මේ වගේ නිලධාරීන් බන්ධනාගාරවල සේවය කිරීමත් සුදුසු නැහැ,” යනුවෙනි.

එබැවින් පැමිණිලිකාර ලුතිනන් කර්නල් ප්‍රභාත් සීවලි බුලත්වත්ත මහතා මහර බන්ධනාගාරයට රැගෙන යෑම ගැටළු සහගත බැවින් ඒ පිළිබඳ පරීක්ෂණයක් කර කරුණු වාර්තා කරන්නැයි කොමිසම මහර බන්ධනාගාර අධිකාරිවරයාට නියෝග කළේය.

මේ අතර, මාධ්‍යවේදී කීත් නොයාර් පැහැර ගෙනගොස් පහර දීම සම්බන්ධයෙන් ප්‍රකාශයක් ලබා ගැනීමට අපරාධ පරීක්ෂණ දෙපාර්තමේන්තුවේ එවකට සහකාර පොලිස් අධිකාරීවරයෙකුව සිටි සිසිර තිසේරා සහ පොලිස් පරීක්ෂක නිශාන්ත ද සිල්වා ඔස්ට්‍රේලියාවට ගොස් ඇති බව අද අනාවරණය විය.

“මෙහි විශේෂත්වයක් තියෙනවා .අපේ නීතියේ කොහෙවත් නැහැ පැමිණිලිකාරයා හොයාගෙන ගිහිල්ලා නඩු දාන්න. ලංකාවේ තවම එහෙම නීතියක් හදලා නැහැ .ඒ අනුව සි.අයි.ඩි නිලධාරින් ඔස්ට්‍රේලියාවට ගිහිල්ලා තියෙනවා නම් රජයේ වියදමින් එය රාජ්‍ය මුදල් අවභාවිත කිරීමක්” ලෙස කොමිසමේ සභාපති විනිසුරුවරයා ප්‍රකාශ කළේය.

ඒ සඳහා රජයේ මුදල් වෙන් කර ඇත්ද? එලෙස වියදම් කල මුදල කොපමණද? ඒ පිළිබඳ සම්පූර්ණ වියදම් වාර්තාවක් වහාම කොමිසමට ලබා දෙන්නැයි ජනාධිපති කොමිසම අපරාධ පරීක්ෂණ දෙපාර්තමේන්තුවේ අධ්‍යක්ෂකවරයාට සිතාසි නිකුත් කළේය.

මෙහිදී කොමිසමේ සභාපති විනිසුරු උපාලි අබේරත්න මහතා ප්‍රකාශ කළේ යහපාලන ආණ්ඩු සමයේදී අපරාධ පරීක්ෂණ දෙපාර්තමේන්තුවේ නිළධාරීන් කිහිපදෙනෙකුම බුද්ධි අංශ නිළධාරීන් දිගින් දිගටම බන්ධනාගාරගත කර තැබීමේ මානසික රෝගයකින් පෙළී ඇති බව පෙනීයන බවය.

මේ අතර හිටපු අමාත්‍ය රාජිත සේනාරත්න මහතා ලුතිනන් කර්නල් ප්‍රභාත් සීවලී බුලත්වත්ත මහතා සම්බන්ධයෙන් ද්වේශ සහගතව කළ ප්‍රකාශයක වීඩියෝ පටයක් අද කොමිසම හමුවේ ප්‍රදර්ශනය කෙරුණි.

Related posts

ගුවන් මගීන්ට තත්පර 20න් ලියාපදිංචි වෙන්න මාර්ග ගත ක්‍රමයක්

colombotoday

‍තොරතුරු දැනගැනීමේ අයිතිවාසිකම් තහවුරුකරන පනත අද පාර්ලිමේන්තුවට

colombotoday

රාජ්‍ය ඇමති වියාලේන්ද්‍රන්ගේ ආරක්ෂකයෙකු‌ගේ වෙඩි පහරින් ටිපර් රථ රියදුරෙක් මරුට

colombotoday

කතක් නිවස තුළ මරා දාලා…

Admin

“මම දුක් මහන්සියෙන් දියුණු වූ මිනිහෙක්.. ගම්මන්පිලට හොද පාඩමක් උගන්වනවා“ – රවී

colombotoday

තවත් මන්ත්‍රීන් 40කට සැප වාහන.. මාසිකව ලක්ෂ 2ක දීමනාවක් ලබාදීමටත් අනුමතයි

colombotoday