හෝමාගම උසාවි භූමියේ කලහකාරී ලෙස හැසිරුණේ යැයි චෝදනාවට රක්ෂිත බන්ධනාගාරගත කර ඇපමත නිදහස් කළ සිංහල රාවය ජාතික සංවිධානයේ ලේකම් මාගලකන්දේ සුදත්ත හිමියන්ට මාර්තු 18 දින කලුතර මහෙස්ත්‍රාත් අධිකරණයේ පෙනී සිටින ලෙස නියෝග කර තිබේ.
ඒ කළුතර බෝධීන් වහන්සේ අභියසදී මාර්ගය අවහිර කර උද්ඝෝෂණයක යෙදුණා යැයි කළුතර පොලිස් කොට්ඨාසය විසින් මාර්තු 10වන දින කරන ලද පැමිණිල්ලකට අනුවයි.
මාගලකන්දේ සුදත්ත හිමියන් ඇතුළු භික්ෂූන්වහන්සේලා පිරිසක් රජය විසින් ගෙන ආ ථෙරවාද කථිකාවත් ලියාපදිංචි කිරීමේ පනතට එරෙහිව පසුගිය ජනවාරි 25වන දින කළුතර බෝධීන් වහන්සේ අභියස මාර්ගයේදී විරෝධතාවක නියැළී ඇත.
මේ සම්බන්ධයෙන් අදහස් දක්වමින් මාගලකන්දේ සුදත්ත හිමියන් පැවසූවේ පැරණි සිදුවීම්වලට අදාලව පැමිණිළි ගොණුකරමින් රජය භික්ෂූන් වහන්සේලාගෙන් පළිගැනීමට කටයුතු කරමින් සිටින බවයි. භික්ෂු පනත හරහා භික්ෂූන් වහන්සේ නිහඩ කිරීමට දැරූ ආණ්ඩුවේ උත්සාහයට එරෙහිව භික්ෂු සාශනය වෙනුවෙන් විරෝධතා දැක්වූ තමන් වහන්සේලාට ක්‍රියාත්මක කරන නීතිය, කොළඹ මහාමාර්ග අවහිර කර ආණ්ඩුව හොදයි කියමින් උද්ඝෝෂණ කළ එජාපයේ හෙංචයියන්ට ක්‍රියාත්මක නොවන්නේ ඇයිදැයි උන්වහන්සේ ප්‍රශ්න කරයි.