බඩල්කුඹුර-අලුපොත ගම්මානයෙන් කොවිඩ් 19 ආසාදිතයින් 24 දෙනෙකු හමුවීමෙන් පසු අද (16)දිනයේ සිට එම ගම්මානය හුදෙකලා ගම්මානයක් කිරීමට පියවරගෙන ඇතැයි මොනරාගල දිසාපති ගුණදාස සමරසිංහ මහතා පැවසීය.
කොළඹ මරදාන ප්‍රදේශයේ සිට අලුපොත ගම්මානයට පැමිණ සිටි පුද්ගලයෙකු කොවිඩ් ආසාදිතයකු බවට අනාවරණයවීමත් සමඟ ඔහු සිටි නිවසේ පිළිකා රෝගයෙන් පෙළෙමින් සිටි කාන්තාවක්ද කොවිඩ් 19 රෝගය වැළඳීමෙන් ඉකුත් (10) වෙනිදා මියයාමෙන් අනතුරුව ගම්වැසියන් දෙසියයකට ආසන්න පිරිසක් පී.සී.ආර් පරීක්ෂණ වලට යොමුකිරීමෙන් අනතුරුව විසිදෙදෙනෙකු කොවිඩ් 19 ආසාදිතයින් බවට හඳුනාගෙන තිබිණි.
මෙම තත්වය හේතුවෙන් සෞඛ්‍ය අමාත්‍යාංශයේ නිර්දේශ මත මෙලෙස හුදෙකලා ගම්මාන බවට පත්කළ බව දිසාපතිවරයා වැඩිදුරටත් පැවසීය.
මෙම ගම්මාන වල නිරෝධායනය වන පවුල්වලට ආහාර ද්‍රව්‍ය ලබාදීමට පියවරගෙන ඇති අතර ඉදිරියේදී සෑම පවුලකටම රුපියල් පන්දහසේ මාසික දීමනාව දීමට කටයුතු කිරීමට නියමිතය.
දැනට මොනරාගල දිස්ත්‍රික්කයෙන් කොවිඩ් 19 ආසාදිතයින් 54 දෙනෙකු හමුවී ඇත.