කොළඹ වරායේ, බටහිර පර්යන්තය සංවර්ධනය සඳහා ආයෝජනයට පාර්ශවකරුවෙකු නම් කරන්නැයි ඉන්දියාවට හා ජාපනයට දැනුම් දීමට ඒ සම්බන්ධයෙන් සාකච්ඡා කිරීමට පත් කළ කමිටුව තීරණය කර තිබේ.
කමිටුවේ සභාපතිවරාය අමාත්‍යාංශයේ ලේකම් යූ.ඩී.සී. ජයලාල් මහතා සඳහන් කළේ, කමිටුව පළමුවරට ඊයේ රැස්වූ අවස්ථාවේදී මෙම තීරණයට එළඹි බවයි.
ඒ අනුව, අදාළ තීරණය මෙරට පිහිටි ඉන්දීය මහකොමසාරිස් කාර්යාලයට හා ජපාන තානාපති කාර්යාලයට නිල වශයෙන් දැනුම් දෙන බව ද ඔහු ප්‍රකාශ කළේය.
යළිත් ලබන සිකුරාදා එම කමිටුව රැස්වීමට නියමිතය.
සාමාජිකයින් 7 දෙනෙකුගෙන් සමන්විත මෙම කමිටුවේ වාර්තාව කඩිනමින් අමාත්‍ය මණ්ඩලය වෙත ඉදිරිපත් කිරීමට සැලසුම් කර ඇති බව ද වරාය අමාත්‍යාංශයේ ලේකම්වරයා ප්‍රකාශ කළේය.