රාජ්‍ය ආරක්ෂක, ස්වදේශ කටයුතු හා ආපදා කළමනාකරණ රාජ්‍ය අමාත්‍යාංශ කාර්ය මණ්ඩලයේ කිහිපදෙනෙකු කොවිඩ් ආසාදිතයින් ලෙස හඳුනාගෙන තිබේ.
එම ආසාදිතයින් ඉදිරි සෞඛ්‍ය ක්‍රියාමාර්ග සඳහා යොමුකර ඇතැයි එම රාජ්‍ය අමාත්‍යාංශය සඳහන් කරයි.
නිවේදනයක් නිකුත් කරමින් එම අමාත්‍යාංශය සඳහන් කර ඇත්තේ, කොවිඩ් ආසාදිතයින් කිහිපදෙනෙකු හමුවුවද අමාත්‍යාංශය වසා දමා නොමැති බවය.
මේ අතර ආසාදිතයින් ලෙස හඳුනාගත් අයගේ ආශ්‍රිතයින් ද හඳුනාගෙන නිරෝධායනයට යොමුකිරීමට කටයුතු කර ඇතැයි එම නිවේදනයේ වැඩිදුරටත් දැක්වේ.
සෙසු කාර්ය මණ්ඩලයේ සෞඛ්‍යාරක්ෂාව තහවුරු කෙරෙන පරිදි සෞඛ්‍යාරක්ෂක උපක්‍රම උපරිමයෙන් ක්‍රියාත්මක බවත්, අමාත්‍යාංශයේ රාජකාරි කටයුතු සුපුරුදු ලෙස අඛණ්ඩව සිදුකෙරෙන බවත් එම අමාත්‍යාංශය වැඩිදුරටත් නිවේදනය කරයි.