නීතිවිරෝධීව තිරිඟු පිටි ලෙස මවාපාමින් මෙරටට ආනයනය කළ උඳු පිටි තොගයක් ඊයේ (21)දින සිය භාරයට ගත් බව ශ්‍රී ලංකා රේගුව සඳහන් කර තිබේ.
මේ සම්බන්ධයෙන් වාප්පු ලිපිකරුවකු ද අත්අඩංගුවට ගැනීමට කටයුතු කර ඇත.
රුපියල් ලක්ෂ 64ක් පමණ වටිනා උඳු පිටි තොගයක් මෙලෙස නීතිවිරෝධී ලෙස ආනයනය කර ඇති බව අනාවරණය වී තිබේ.
ඉන්දියාවේ සිට මෙරටට ගෙන්වූ බහාලුම තුළ රුපියල් 10,77,000ක් වටිනා තිරිඟු පිටි කිලෝ ග්‍රෑම් 18,000ක් තිබෙන බව ආනයනයකරුවා විසින් රේගුවට සඳහන් කර ඇත. කෙසේ නමුත් අදාල බහාලුම විවෘත කර ඊයේ (21)දින පරික්ෂා කිරීමේදී ඒ තුළ තිබී උඳු පිටි කිලෝ ග්‍රෑම් 15,060ක් අඩංගු මලු 502ක් රේගු නිලධාරීන් විසින් සොයා ගෙන ඇත.