හිටපු නාවික හමුදාපති වසන්ත කරන්නාගොඩ මහතාට අද (05) හා අනිද්දා (06) දිනයන්හිදී අපරාධ පරීක්ෂණ දෙපාර්තමේන්තුවට පැමිණෙන ලෙස ලිඛිතව දැනුම්දී ඇතැයි වාර්තා වේ. ඒ මහතාට මෙසේ පැමිණෙන ලෙස දන්වා ඇත්තේ B732 නැමැති පැමිණිල්ල සම්බන්ධයෙන් ප්‍රකාශයක් ගැනීමටය.
අදාළ පැමිණිල්ල, පසුගිය සමයේ කොළඹ නගරයේ පුද්ගලයින් එකොළොස් දෙනෙකු අතුරුදහන් කිරීමේ සිද්ධියක් සම්බන්ධයෙන් කරන ලද එකකි.
මේ පැමිණිල්ල සිදුකර ඇත්තේද හිටපු නාවික හමුදාපතිවරයා වන අතර, හිටපු හමුදාපතිවරයාව මේ පැමිණිල්ල සම්බන්ධයෙන් ප්‍රකාශයක් ගැනීමට අපරාධ පරීක්ෂණ දෙපාර්තමේන්තුව කැඳවා ඇත්තේ වසර හතහමාරකට පසුවවීම විශේෂ සිද්ධියකි.
අපරාධ පරීක්ෂණ දෙපාර්තමේන්තුවට කරන්නාගොඩ මහතා අදාළ පැමිණිල්ල කර ඇත්තේ 2009 මැයි 28 වැනිදාය.
කෙසේවුවද, අදාළ සිද්ධියේ ප්‍රධාන සැකකරු වන නාවික හමුදා නිලධාරියකු වන ක්‍රිෂාන්ත වෙළගෙදර නැමැත්තා පසුගිය සැප්තැම්බර් 13 වැනිදා අපරාධ පරීක්ෂණ දෙපාර්තමේන්තුවට ලබාදී ඇති ප්‍රකාශයකට අනුව කරන්නාගොඩ මහතා අත්අඩංගුවට පත්වීමේ හැකියාවක් ඇති බවද මේ අතර වාර්තා වේ.