ජාතිවාදී සහ ආගම්වාදී ආකාරයට ක්‍රියාත්මක වෙමින් අන්‍යාගමිකයන්ට හිරිහැර කරන සහ අන්‍යාගමික මධ්‍යස්‌ථානවලට පහරදෙන සංවිධානාත්මක කල්ලිවලට එරෙහිව කටයුතු කිරීමට පූර්ණ බලතල සහිත විශේෂ පොලිස් ඒකකයක්‌ පිහිටුවීමට රජය තීරණය කර ඇත.
අගමැති රනිල් වික්‍රමසිංහ මහතාගේ උපදෙස්‌ මත නීතිය හා සාමය පිළිබඳ අමාත්‍යාංශය යටතේ මෙම ඒකකය පිහිටුවන අතර, පොලිස් දෙපාර්තමේන්තුවේ දක්‍ෂ හා කාර්යක්‍ෂම නිලධාරිහු පිරිසක් මෙම ඒකකයට අනුයුක්‌ත කෙරෙති.
අන්‍යාගමික ස්‌ථානවලට පහරදීමක්‌ හෝ යම් කලබලකාරී සිද්ධියක්‌ ඇතිවුවහොත් ක්‍ෂණිකව එම ස්‌ථානවලට පොලිස් නිලධාරීන් යෙදවීම, විමර්ශන කිරීම හා උපදෙස්‌ දීම මෙම ඒකකයේ කාර්යභාරය වේ.
අන්‍යාගමික ස්‌ථානවලට පහරදෙන සංවිධානාත්මක කණ්‌ඩායම් පිළිබඳව සකස්‌ කෙරුණු වාර්තාවක්‌ ද ලබන සතියේ ජනාධිපතිවරයා සහ අගමැතිවරයා වෙත බුද්ධි අංශ මඟින් භාර දීමට ද නියමිතය.
-අකිත පෙරේරා