කොළඹ දිස්ත්‍රික්කයෙන් කොවිඩ් -19 වෛරසය ආසාදනය වූ රෝගීන් 295 දෙනෙකු ඊයේ (06) වාර්තා වී තිබේ.
ඒ අනුව ඊයේ දිනය තුළ හඳුනාගත් සමස්ත කොවිඩ් රෝගීන් 649 දෙනා අතරින් වැඩිම පිරිසක් වාර්තා වී ඇත්තේ කොළඹ දිස්ත්‍රික්කයෙනි.
මීට අමතරව ගම්පහ දිස්ත්‍රික්කයෙන් නව ආසාදිතයින් 87 දෙනෙකු සහ කළුතර දිස්ත්‍රික්කයෙන් ආසාදිතයින් 51 දෙනෙකු ඊයේ දිනයේ හඳුනාගෙන තිබේ.
එක්සත් ආරාබි එමීර් රාජ්‍යයේ සිට පැමිණි එක් ශ්‍රී ලාංකිකයෙකු ද කොවිඩ් ආසාදිතයෙකු ලෙස ඊයේ හඳුනාගෙන තිබුණි.
මේ වනවිට මිනුවන්ගොඩ සහ පෑලියගොඩ කොවිඩ් පොකුරින් ආසාදිතයින් 24,318 දෙනෙකු හඳුනාගෙන ඇති අතර ඉන් ආසාදිතයින් 17,052 දෙනෙකු පූර්ණ සුවය ලබා ඇත.
මෙරටින් වාර්තාවන සමස්ත කොවිඩ් -19 ආසාදිතයින් සංඛ්‍යාව 27,876කි.
ඉන් 20,459 දෙනෙකු පූර්ණ සුවය ලබා ඇති බව කොවිඩ් -19 පැතිරීම වැළැක්වීමේ ජාතික ක්‍රියාන්විත මධ්‍යස්ථානය පවසයි.
තවදුරටත් රෝගීන් 7,277 දෙනෙකු රෝහල් තුළ සහ අතරමැදි ප්‍රතිකාර මධ්‍යස්ථාන තුළ ප්‍රතිකාර ලබමින් සිටි.
කොවිඩ් -19 ආසාදිතව මෙරට තුළ සිදුවී ඇති සමස්ත මරණ සංඛ්‍යාවද 140ක් දක්වා ඉහළ ගොස් තිබේ.