හිටපු ජනාධිපති ගෝඨාභය රාජපක්ෂට නවාතැන්ගෙන සිටින හෝටල් කාමරයෙන් පිටතට නොයන ලෙස තායිලන්ත ආරක්ෂක අංශ විසින් දැනුම්දී තිබේ.
පවතින ආරක්ෂක තත්ත්වය මත එම දැනුම්දීම සිදුකර ඇති බව විදෙස් මාධ්‍ය වාර්තා කළේය.
මාසයකට ආසන්න කාලයක් සිංගප්පූරුවේ රැඳීසිටි ගෝඨාභය රාජපක්ෂ මහතා තවත් පුද්ගලයින් තිදෙනෙකු සමග සිංගප්පූරු ගුවන් යානයකින් ඊයේ (12) රාත්‍රියේ තායිලන්තයට පැමිණ තිබුණි.
අදාළ ගුවන් යානය තායිලන්තයේ ෆුකෙට් ගුවන්තොටුපොළ වෙත ගොඩබෑමට සැලසුම් කර තිබුණ ද හිටපු ජනාධිපතිවරයා එරට පැමිණීම පිළිබඳ තොරතුරු අනාවරණය වීම හේතුවෙන් එම ගුවන් යානය බැංකොක්හි පිහිටි හමුදා ගුවන් තොටුපොළක් වෙත හරවා යවා ඇත.
ආක්ෂක හේතූන්මත ගෝඨාභය රාජපක්ෂ මහතා රැඳීසිටින හෝටලයේ නම හෙළිකර නොමැති අතර ඔහුගේ ආරක්ෂාව සඳහා එම හෝටලයේ සිවිල් ඇඳුමින් සැරසුණු ආරක්ෂක නිලධාරින් යොදවා ඇති බව වාර්තා වේ.
දින 90ක කාලයක් හිටපු ජනාධිපති ගෝඨාභය රාජපක්ෂ මහතා තායිලන්තයේ රැඳීසිටිමට නියමිත අතර පසුව ලබන නොවැම්බර් මාසයේ ඔහු මෙරටට පැමිණීමට නියමිත බව වාර්තා වේ.